កាលពីដើមខែមេសាកន្លងទៅ បុរសម្នាក់ឈ្នោះ Tim Blakey ដែលជាគ្រូបង្វឹកជិះស្គីទឹកកកម្នាក់បានធ្វើការ អគុណទៅកាន់ក្រុមហ៊ុន Apple ព្រោះថាមុខងារ Emergency SOS នៅក្នុងទូរសព្ទ iphone បានជួយសង្គ្រោះជីវិតលោកអំពីការជាប់នៅក្នុងបំណាក់ទឹកកកដែលលោកបានធ្លាក់ចូល។ នេះបើយោងតាមការចុះផ្សាយរបស់សារព័ត៌មាន Appleinsider។
ប្រភពដដែលបានបន្តថា លោក Tim Blakey បានធ្លាក់ចូលទៅក្នុងបំណាក់ទឹកកកជម្រៅ 5m នៅទីក្រុង Zermatt ប្រទេសស្វីស កំឡុងពេលដែលលោកបានធ្វើដំណើរតែម្នាក់ឯងនៅក្នុងតំបន់នោះ បន្ទាប់ពីពេលដែលលោកបានធ្លាក់លោកបានព្យាយាមទាក់ទងទៅរកជំនួយប៉ុន្តែទាក់ទងមិនបានព្រោះនៅក្រោមនោះមិនមានសេវាទូរសព្ទនោះទេ ភ្លាមនោះគាត់ក៏បាននឹកឃើញថា ទូរសព្ទលោកមានមុខងារជំនួយបន្ទាន់ហើយមុខងារនេះពិតជាអាចជួយជីវិតលោកបានមែន។
បន្ទាប់ពីការជួយសង្គ្រោះជីវិតបានជោគជ័យលោកបានថ្លែងអំណរគុណទៅកាន់ក្រុមអ្នកសង្គ្រោះ និង ក្រុមហ៊ុនទូរសព្ទ iphone ព្រោះនៅពេលដែលលោកធ្លាក់ចូលទៅនោះ ថ្មទូរសព្ទលោកនៅសល់ត្រឹមតែ ៣% ណាមួយនៅខាងក្រោមនោះគ្មានសេវាទូរសព្ទទៀត ប៉ុន្តែលោកនៅតែអាចទំនាក់ទំនងជាមួយក្រុមសង្គ្រោះបានជាធម្មតា។
គូសបញ្ជាក់ថា មុខងារ Emergency SOS នេះលោកអ្នកអាចធ្វើការស្នើសុំជំនួយពីភ្នាក់ងារផ្សេងៗដោយមិនចាំបាច់មានសេវាទូរសព្ទ ឬថ្មនៅបន្តិចបន្ទួចក៏ទាក់ទងបានដែរ៕
